El Xaretón del Embeligru, asoma ensín mieu al fríu

Esta selmana, del 10 d’avientu, Suburbia Ediciones pon a la venta’l llibru de rellatos de Milio Mariño El Xaretón del Embeligru.

El llibru atroca trece rellatos, escritos nun asturianu cenciellu y candial, nos que l’autor, con retranca y mui bon humor, apurre una güeyada particular de la vida de cutiu y de les chifladures que nos aforfuguen y nun mos atrevemos a dexar salir, pol aquello de que nun vayan pensar que, daveres, tamos chiflaos.

Nesti llibru xuntase'l realismu cola comicidá y, el resultáu, ye una miesta de fantasía y riseríu, entrevenáu con esa güeyada, crítica y piraván, qu’aveza gastar Mariño en tola so obra, tanto periodística como de ficción.

Milio Mariño foi collaborador del selmanariu Les Noticies y ye habitual articulista d’opinión nel diariu La Nueva España. Tien publicáu un llibru de rellatos, Esconderites, colos caberos narradores n’asturianu y atroca un montón de premios lliterarios tanto en castellanu como n’asturianu.