LES NOTICIES. REDACCIÓN. UVIÉU - 14/12/2012.
Suburbia ediciones acaba d'editar El xaretón del embeligru, de Milio Mariño, un llibru formáu por trece rellatos, escritos nun asturianu cenciello y candial, «nos que l'autor, con retranca y mui bon humor, ufre una mirada particular de la vida de cutiu y de les chifladures que nos aforfuguen y non mos atrevemos a dexales salir, pol aquello de que nun vaigan pensar que, daveres, tamos chiflaos», indica la editorial.
Milio Mariño collaboró en LES NOTICIES y collabora, dende hai más de diez años, como articulista d'opinión del diariu La Nueva España. Publicó, xunto con otros narradores, el llibru Esconderites, que tamién foi traducíu y publicáu en castellanu. Ente los premios que tien figura'l Premiu de Narraciones Fantástiques, Premiu Rellatos de la Mar, Premiu IV Selmana Internacional del Humor, Premiu al meyor Pregón de les Fiestes de El Bollu d'Avilés, Premiu Los Bilordios de Pinón y Premiu de Narraciones Piloña.
